L’attest da salari svizzer è in formular per las lavurantas ed ils lavurants e che cuntegna infurmaziuns davart il salari pajà da la patruna u dal patrun. En l’attest èn inditgads tut las contribuziuns, las prestaziuns ed ils supplements.
Vossa patruna u Voss patrun è obligà d'As emetter mintga onn in attest da salari. Normalmain survegnis Vus quel fin la fin da schaner. Sche Vus avais gì pliras plazzas da lavur u sche Vus avais midà plazza en il decurs da l’onn, survegnis Vus in attest per mintga plazza.
L'attest da salari è il pli impurtant document per la decleraziun da taglia. En intgins chantuns èn las patrunas ed ils patruns obligads da trametter quest attest directamain a las autoritads da taglia. Agiuntar l’attest da salari a la decleraziun da taglia stuais Vus sco lavuranta u lavurant en quest cas mo, sche Vus lavurais tar ina patruna u in patrun extrachantunal u sche quai vegn dumandà da l'autoritad fiscala cumpetenta.
Sche Vossa patruna u Voss patrun n’As ha betg tramess l’attest da paja, sche quel cuntegna sbagls u sche Vus l’avais pers, stuais Vus dumandar directamain la patruna u il patrun per in nov attest da paja.
Sche Vus essas patruna u patrun da lavur e na savais betg co proceder, suandai l’instrucziun da l’Administraziun federala da taglia per emetter in attest da paja. Exempels da formulars èn avant maun en differents formats.
Vus pudais medemamain utilisar la software gratuita per emetter in attest da paja electronic.
L’Administraziun federala da taglia porscha in mussavia e ina glista cun las dumondas las pli frequentas davart l’attest da paja.
La glista da las administraziuns chantunalas da taglia As infurmescha davart ils posts en Voss chantun che porschan infurmaziuns e documents davart l’attest da paja.