La paternitad dal consort da la mamma da l’uffant (paternitad supponida) po vegnir contestada mo dal consort sez u da l’uffant.
La paternitad da l’um che ha renconuschì in uffant po percunter vegnir contestada da tut las persunas pertutgadas – vul dir er da la mamma da l’uffant u da l’um che declera dad esser il bab biologic.
As drizzai ad in'advocata u ad in advocat per vegnir a savair:
tge premissas che Vus stuais ademplir
entaifer tge termins che Vus pudais contestar la paternitad
a tge dretgira che Vus As stuais drizzar
Il test da paternitad po esser ina cumprova utila, sch’ins vul renconuscher u contestar ina paternitad avant dretgira. In tal test è mo valaivel, sch’el è vegnì fatg sut tschertas cundiziuns ed en spezial d’in institut per medischina forensica u tar in labor renconuschì da la Confederaziun (tests che vegnan purschids en l’internet na valan betg sco cumprova davant dretgira). Per in tal test dovri plinavant il consentiment en scrit da las persunas pertutgadas.
Per infurmaziuns davart la valaivladad d’in test da paternitad As drizzai ad in'advocata u ad in advocat.
Sche la dretgira accepta il plant per contestar la paternitad, finescha la paternitad da l’um che valeva fin lura sco bab. El n’ha nagins dretgs e naginas obligaziuns pli envers l’anteriur uffant. En cas che l’uffant purtava ses num, vegn quel midà ed el survegn il num da la mamma. Ultra da quai po l’uffant vegnir renconuschì d’in auter um.
Per ulteriuras infurmaziuns davart las premissas, davart il proceder e davart ils termins per contestar ina paternitad As drizzai ad in'advocata u ad in advocat.
Labors renconuschids da la Confederaziun per far profils da DNA (test da paternitad)