En l’attestat da lavur sto Vossa superiura u Voss superiur menziunar en emprima lingia ils suandants puncts:
cumenzament e fin da la relaziun da lavur
funcziun e lavurs fatgas
pertschients da plazza
valitaziun da la qualitad da Vossa lavur
valitaziun da Voss cumportament
motiv per l’emissiun da l’attestat (disditga, midada da la superiura u dal superiur, nova funcziun e.u.v.)
Vossa patruna u Voss patrun As sto emetter l’attestat da lavur en scrit.
La descripziun da la relaziun da lavur sto esser cumpletta e vardaivla e la patruna u il patrun sto valitar cun bainvulientscha. Sche Vus constatais inexactadads, sbagls u manzegnas, pudais Vus pretender da Vossa superiura u da Voss superiur, ch’ella u el midia il text.
L’attestat da lavur na dastga cuntegnair naginas formulaziuns intschertas u nagins codes che pon vegnir interpretads en differentas modas.
Singuls incidents negativs (per exempel in retard excepziunal) u incidents senza influenza directa sin la relaziun da lavur na duessan er betg vegnir menziunads.
Per infurmaziuns pli detagliadas As metta il Secretariat da stadi per l’economia (SECO) a disposiziun ina glista cun dumondas frequentas.