Uffizis d’objects chattads ee easyfind.ch

Sche Vus avais pers insatge, pudais Vus As drizzar a l’uffizi d’objects chattads correspundent. La chattadra u il chattader è obligada u obligà da dar giu objects chattads – per exempel documents d’identitad (ID u passaport), raps, ina carta da credit u clavs da l’auto – a l’uffizi d’objects chattads.

Sin easyfind.ch pudais Vus far in’annunzia da perdita online e retschertgar, sche Voss object è vegnì dà giu tar in dals uffizis d’objects chattads che fan part. Pli exactamain che Vus descrivais Voss object, e pli gronda che la probabilitad è d’al survegnir enavos.

Per cas che Vus avais registrà Voss object tar l’uffizi d’objects chattads online easyfind.ch e sche Vus l’avais marcà cun in tatgader cun in code dad easyfind (betg gratuit), na stuais Vus far nagut. Vus vegnis infurmada u infurmà automaticamain, sche l’object vegn chattà.

Sche Vus chattais insatge e na savais betg a tgi che l’object tutga, essas Vus obligada u obligà da dar giu el tar il post correspundent. Il lieu, nua che Vus pudais dar giu l’object chattà, è inditgà en il chapitel «Pers in object – nua tschertgar?».

Sche Vus chattais in object cun in tatgader cun in code dad easyfind, pudais Vus contactar gratuitamain la proprietaria u il proprietari sin la pagina d’internet. Vus pudais dentant er dar giu l’object tar l’uffizi d’objects chattads correspundent.

Sche Vus chattais in object e l’annunziais u al dais giu tar il post correspundent, ha la proprietaria u il proprietari temp tschintg onns per retrair quel. Suenter quest temp tutga l’object a Vus.