Vus pudais As proteger il meglier cunter traplas en l’internet, sche Vus savais, co ch’i vegn cugliunà, mess sut squitsch e pretendì insatge e fatg mobing en l’internet. L’Uffizi federal da la cybersegirezza (UFCS) e la Prevenziun svizra da la criminalitad infurmeschan en moda cumplessiva davart il phishing, las traplas tar ils abunaments, l’extorsiun sexuala, il cybermobing e.u.v.
Sper las persunas privatas survegnan er interpresas, autoritads sco er spezialistas e spezialists dad IT bleras infurmaziuns e tips utils dal UFCS per sa proteger cunter cyberattatgas.
Annunziar e consultar incidents actuals
Il UFCS publitgescha regularmain trics actuals dals cybercriminals e cugliunarias (e-mails falsifitgads u telefons, malware en circulaziun e.u.v.) sin sia pagina d’internet. Tgi ch’è malsegir, sch’ella u el è daventà la victima d’in cybercriminal u tgi che vegn a savair da novs incidents, po annunziar quels là sin via electronica.
Tgi ch’è daventà la victima da cybercriminals, chatta agid sin la pagina d’internet dal UFCS u sin la pagina d’internet da la Prevenziun svizra da la criminalitad (PSC). Tgi che ha subì in donn, po inoltrar ina denunzia penala a la polizia chantunala cumpetenta.
Infurmaziuns falladas che vegnan derasadas cun intenziun en l’internet, pon falsifitgar la furmaziun da l’opiniun ed influenzar en moda negativa las elecziuns e las votaziuns. Ed er mintga singula persuna po vegnir donnegiada, sche manzegnas e famas vegnan derasadas davart ella.
La plattafurma Giuventetgna e medias gida a tractar en moda critica e cun prudientscha las infurmaziuns. Ella n’è betg mo interessanta per la glieud giuvna. Ils numerus tips per identifitgar fake news, dischinfurmaziuns u teorias conspirativas pon gidar tuttas e tuts.
La plattafurma Giuventetgna e medias gida a tractar en moda critica e cun prudientscha las infurmaziuns. Ella n’è betg mo interessanta per la glieud giuvna. Ils numerus tips per identifitgar fake news, dischinfurmaziuns u teorias conspirativas pon gidar tuttas e tuts.