Sche duas candidatas u candidats survegnan tuttina bleras vuschs, ma sche mo in sez è d'occupar, decida la sort, tgenina da las duas persunas ch'è elegida.
Quai è fixà en la Lescha federala davart ils dretgs politics sco er en ina decisiun dal Tribunal federal.
Per trair la sort ston vegnir resguardadas differentas prescripziuns, en spezial sto la sort vegnir:
ordinada da la regenza chantunala
tratga al lieu tras ina commembra u in commember da la regenza chantunala u tras ina represchentanza
tratga a maun
tratga en il rom d'ina sesida publica Cunzunt las candidatas ed ils candidats sco er las partidas ch'èn pertutgads da la decisiun han il dretg dad esser preschents a la decisiun tras la sort.
Trair la sort sin via electronica n'è percunter betg permess, en emprima lingia perquai ch'il tractament egual da las candidatas e dals candidats na fiss betg garantì uschia.
23 979 vuschs ha survegnì Monica Duca Widmer, la candidata tessinaisa da la Partida cristiandemocratica (PCD) per il Cussegl naziunal, a chaschun da las elecziuns da l'onn 2011.
23 979 vuschs ha dentant er survegnì Marco Romano, medemamain candidat tessinais da la PCD per il Cussegl naziunal.
Tgi ha la finala survegnì il sez en il Cussegl naziunal? La saira da la dumbraziun da las vuschs ha in computer decidì en il rom d'ina procedura automatisada, che Monica Duca Widmer saja elegida.
Differentas burgaisas e burgais han fatg recurs cunter quest resultat. Il Tribunal federal ha annullà la decisiun electronica tras la sort.
Ils 25 da settember 2011 ha il chantun Tessin tratg la sort a maun. Vegnì elegì è Marco Romano.
Che duas candidatas e candidats per il Cussegl naziunal survegnan tuttina bleras vuschs, è ina gronda raritad.
I dat anc in ulteriur cas d'ina decisiun tras la sort en connex cun las elecziuns dal Cussegl naziunal. Quai però per auters motivs che quels da l'onn 2011. Ed ins sto ir lunsch enavos fin tar las elecziuns dal Cussegl naziunal da l'onn 1939. Quella giada avevan dus candidats dal chantun Basilea-Champagna – Hugo Gschwind (Partida catolic-conservativa) e Walter Hilfiker (Partida socialdemocratica) – survegnì tuttina bleras vuschs e fissan tuts dus stads elegids. Ins ha dentant stuì trair la sort, perquai che la veglia Constituziun dal chantun Basilea-Champagna preveseva che mo in commember da la regenza chantunala possia vegnir elegì en il Cussegl naziunal. Gschwind e Hilfiker eran numnadamain tuts dus commembers da la regenza chantunala. La sort ha decidì per il candidat catolic-conservativ.
Basas legalas
Decisiuns dal Tribunal federal