Permiss per emprender a manischar, examen teoretic e pratic da manischar

Ils pass che mainan al permiss da manischar

Cliccai per vesair pass necessaris.

1 / 0

Dumandar in permiss per emprender a manischar

Per pudair emprender d’ir cun auto u cun moto duvrais Vus in permiss per emprender a manischar. Ils pass necessaris pudais Vus prender per mauns gia avant il 17avel anniversari.

Curs d’agid d’urgenza

Frequentai in curs d’agid d’urgenza per che Vus possias dumandar in permiss per emprender a manischar. Il curs d’agid d’urgenza vala sis onns.

Dumonda

La dumonda per in permiss per emprender a manischar pudais Vus per regla far a l’autoritad responsabla il pli baud in mais avant il 17avel anniversari.

Il formular da dumonda pudais Vus telechargiar da la pagina d’internet da l’uffizi per il traffic sin via da Voss chantun da domicil ed al inoltrar al lieu inditgà.

Examen da teoria

Sche las autoritads han aderì a Vossa dumonda per in permiss per emprender a manischar, pudais Vus As annunziar per l’examen da teoria. En la gronda part dals chantuns vegnis Vus supplitgada u supplitgà d’As annunziar via l’internet.

Ils custs per l’examen da teoria varieschan da chantun a chantun. As infurmai per plaschair tar l’uffizi per il traffic sin via da Voss chantun da domicil.

L’examen da teoria pudais Vus repeter uschè bleras giadas sco quai che Vus vulais.

Suenter che Vus avais passà l’examen da teoria cun success, survegnis Vus il permiss per emprender a manischar.

Manischar cun il permiss per emprender a manischar

Cun il permiss d’emprender a manischar pudais Vus ir cun auto cun ina persuna accumpagnanta. Las motociclistas ed ils motociclists pon ir cun moto er senza ina persuna accumpagnanta.

Reglas per la persuna accumpagnanta

Sco persuna accumpagnanta stuais Vus avair almain 23 onns, avair passà l’examen da manischar avant almain 3 onns ed avair il permiss definitiv da manischar.
Durant il viadi stuais Vus guardar che la segirezza vegnia garantida e che las reglas da traffic vegnian resguardadas.
Vus stuais pudair cuntanscher ed utilisar il frain da maun senza problems.
Sco persuna accumpagnanta stais Vus bun per surpassaments, sche Vus na resguardais betg Vossas obligaziuns. La scolara u il scolar da manischar è responsabla u responsabel per cuntravenziuns, ch’ella u ch’el avess pudì evitar sin basa dal nivel da sia scolaziun.

Ulteriuras Reglas per viadis d’emprender a manischar

Sin la vart davos da l’auto stuais Vus fixar a moda bain visibla ina tavla blaua cun in «L» alv. La tavla stuais Vus allontanar sch’i na sa tracta betg d’in viadi d’emprender a manischar.
Per viadis d’emprender a manischar dastgais Vus utilisar mo vehichels a motor, per ils quals i dat ina assicuranza da responsabladad.
Ni Vus ni Vossa persuna accumpagnanta dastgais baiver alcohol avant in viadi d’emprender a manischar (a partir da 0,1 promils As rendais Vus chastiabla u chastiabel).
Tar viadis d’emprender a manischar dastgan auters passagiers esser preschents. Transports professiunals da persunas n’èn dentant betg lubids.

Valaivladad dal permiss per emprender a manischar

Per autos (categoria B) è il permiss per emprender a manischar valaivel 24 mais e per motos (categoria A) 4 mais.
Voss permiss per emprender a manischar vala sulettamain en Svizra. Viadis d’emprender a manischar a l’exteriur n’èn betg recumandads per motivs d’assicuranza.

Instrucziun da traffic

L’instrucziun da traffic è obligatorica. Ella dura 8 uras e po esser repartida sin dus fin quatter dis. Ella vegn purschida d’autoscolas e da scolastas e scolasts d’ir cun auto.

Vus duvrais in permiss valaivel per emprender a manischar per pudair frequentar l’instrucziun da traffic.

Per l’examen pratic d’ir cun auto As pudais Vus pir annunziar, cura che Vus avais frequentà l’instrucziun da traffic. Excepziun: Sche Vus possedais gia in permiss da manischar da la categoria A, A1 u B1, na stuais Vus betg pli frequentar l’instrucziun da traffic.

L’examen d’ir cun auto

Sche Vus avais survegnì il permiss d’emprender a manischar avant che Vus avais cumplenì 20 onns, pudais Vus far l’examen pratic pir dudesch mais pli tard. Ina experta u in expert giuditgescha, sche Vus manischais a moda segira e resguardais las reglas da traffic. Vossa scolasta u Voss scolast d’ir cun auto po giuditgar il meglier, sche Vus essas capabla u capabel da passar l’examen. Senza instrucziun professiunala na vegnis Vus strusch da passar l’examen.

Vus As pudais annunziar per l’examen d’ir cun auto tar l’uffizi per il traffic sin via da Voss chantun da domicil.

Pretensiuns per l’examen

L’examen pratic d’ir cun auto stuais Vus absolver en in vehichel da la categoria da vehichels correspundenta.

A l’examen stuais Vus prender cun Vus ils suandants documents:

in document d’identitad valaivel (passaport, carta d’identitad u document da legitimaziun da persunas estras)
Voss permiss per emprender a manischar
Voss permiss da manischar, en cas che Vus dastgais manischar vehichels d’autras categorias
il document dal vehichel per il vehichel d’examen.

Sche Vus passais l’examen

Sche Vus avais dumagnà l’examen d’ir cun auto, survegnis Vus il permiss da manischar a prova cun la posta.

Sche Vus na passais betg l’examen

Sche Vus na dumagnais betg l’examen l’emprima giada, pudais Vus per regla repeter quel suenter in mais.

Dubla nunreussida

Sche Vus na dumagnais per la segunda giada betg l’examen d’ir cun auto, stuais Vus mussar in attest d’ina scolasta admessa u d’in scolast admess d’ir cun auto per As pudair annunziar ina terza giada. Quest attest sto confermar che Vus avais terminà Vossa scolaziun d’ir cun auto.

Tripla nunreussida

Sche Vus na dumagnais per la terza giada betg l’examen pratic d’ir cun auto, stuais Vus far in examen d’abilitad da manischar. Pir alura pudais Vus far l’examen ina quarta giada. Sche Vus na dumagnais betg quest test, daventa Voss permiss d’emprender a manischar nunvalaivel. Alura stuais Vus far in’expertisa psicologica da traffic. Questa expertisa sto esser positiva per che Vus possias As annunziar ina quarta giada per l’examen d’ir cun auto.

Permiss da manischar sin emprova

Sche Vus acquistais per l’emprima giada in permiss da manischar da la categoria A (motos) u da la categoria B (auto), survegnis Vus sco emprim in permiss da manischar a prova.

Quant ditg dura il temp d'emprova?

Il temp da prova dura trais onns. Per cas che Vus stuessas dar giu il permiss da manischar pervia d’ina cuntravenziun mesauna u greva, vegn il temp d’emprova prolungà per in onn.

Curs da perfecziunament

Durant il temp da prova stuais Vus frequentar in curs da perfecziunament che dura in di. Suenter che Vus avais survegnì il permiss da manischar a prova, stuais Vus frequentar l’uschenumnà curs da perfecziunament aifer dudesch mais.

Permiss definitiv da manischar

Sch’il temp da prova è scadì e sche Vus avais frequentà il curs da perfecziunament, pudais Vus dumandar il permiss definitiv da manischar. Vus na stuais far pli nagins examens.

Custs dal permiss da manischar

Quant ch’i custa exactamain d’emetter il permiss da manischar dependa da Voss chantun da domicil, dal dumber da lecziuns e dal dumber da provas d’examen che Vus duvrais. Vus stuais calcular cun ils suandants custs:

examen da la vesida: 10 fin 15 francs
curs d’agid d’urgenza: 100 fin 200 francs
cudesch da teoria (betg obligatoric): circa 30 francs
examen da teoria: 30 fin 40 francs
permiss per emprender a manischar: 20 fin 80 francs
instrucziun da traffic: 200 fin 280 francs
lecziun da manischar (betg obligatoric, 45-50 min.): 80 fin 110 francs per lecziun
examen pratic da manischar: 120 fin 140 francs
curs da perfecziunament: 340 fin 510 francs
permiss da manischar a prova: 30 fin 60 francs
permiss definitiv da manischar: 15 fin 70 francs

As infurmai per plaschair tar l’uffizi per il traffic sin via da Voss chantun da domicil davart las taxas exactas.

Ulteriuras infurmaziuns

Tschertga

Emprender ad ir cun auto