Uschia vegn elegì il Cussegl naziunal

Sistem electoral dals blers chantuns

En ils chantuns ZH, BE, LU, SZ, ZG, FR, SO, BS, BL, SH, SG, GR, AG, TG, TI, VD, VS, NE, GE e JU elegiais Vus las represchentantas ed ils represchentants dal Cussegl naziunal tenor il sistem da proporz. En proporziun da las vuschs obtegnidas vegnan ils sezs repartids l'emprim sin las glistas. Suenter survegnan quellas candidatas e quels candidats d'ina glista, che han survegnì las pli bleras vuschs, ils sezs che la glista ha obtegnì.

Sche Vus elegiais en in dals chantuns numnads, stuais Vus observar ils suandants pass:

Mussavia per eleger

1 / 0

Tscherni in cedel electoral

Duvrai in dals cedels electorals uffizials che Vus survegnis per posta sco part dal material electoral. Vus pudais midar il cedel electoral u laschar quel sco ch'el è. Qua sutvart vegnan tut las pussaivladads descrittas.

Duvrai in cedel electoral prestampà senza midar quel

Sch'il cedel electoral prestampà che vegn proponì d'ina partida u d'ina gruppa As cunvegn, alura mettai quel senza midadas en la cuverta ch'è previsa per quest intent.

La partida survegn tantas vuschs, sco quai ch'igl ha nums e lingias vidas sin la glista. Tut las candidatas ed ils candidats sin il cedel electoral survegnan ina vusch. Las candidatas ed ils candidats che figureschan duas giadas sin la glista prestampada survegnan duas vuschs.

Adattai in cedel electoral prestampà

Sch'il cedel electoral prestampà n'As cunvegn betg dal tut, avais Vus las suandantas pussaivladads da l'adattar. Vus pudais er cumbinar questas pussaivladads:

Stritgar: Sche Vus na vulais betg dar Vossa vusch a tschertas candidatas e candidats che figureschan sin il cedel electoral, pudais Vus stritgar quellas e quels. Stritgai tras per quest intent tut las indicaziuns da la persuna
-> La persuna stritgada na survegn nagina vusch. Las persunas stritgadas dumbran sco vuschs per la glista.
Cumular: Sche Vus vulais dar ina segunda vusch ad ina persuna ch'è gia sin il cedel electoral prestampà, stuais Vus agiuntar a maun il num ed il numer da candidat da questa persuna.
-> La persuna che vegn numnada duas giadas sin il cedel electoral, survegn duas vuschs da candidat e la glista survegn er duas vuschs.
Attenziun: In num na dastga betg figurar pli che duas giadas sin in cedel electoral, ed il dumber total dals nums sin il cedel electoral na dastga betg esser pli grond ch'il dumber dals sezs ch'èn attribuids a Voss chantun. Sche quest dumber è gia cuntanschì e sche Vus vulais cumular, stuais Vus l'emprim stritgar in num.
Panaschar: Sche Vus vulais adattar ina glista e cumplettar quella cun candidatas e candidats d'autras glistas da Voss chantun, stuais Vus agiuntar a maun ils nums ed ils numers da las candidatas e dals candidats giavischads sin il cedel electoral prestampà.
-> Ina persuna agiuntada survegn ina vusch da candidat e la glista, sin la quala questa persuna figurava oriundamain, survegn ina vusch da partida. La glista midada perda ina vusch da partida.
In num na dastga betg figurar pli che duas giadas sin in cedel electoral, ed il dumber total dals nums sin il cedel electoral na dastga betg esser pli grond ch'il dumber dals sezs ch'èn attribuids a Voss chantun. Sche quest dumber è gia cuntanschì e sche Vus vulais panaschar, stuais Vus l'emprim stritgar in num.

Empleni il cedel electoral vid

Vus pudais duvrar il cedel electoral vid ed emplenir quel cun las persunas da Vossa tscherna:

Champ per il num da la glista: Vus pudais laschar vid quest champ u emplenir quel cun il num u cun il numer d'ina glista prestampada.
Lingias per candidatas e candidats: Vus pudais scriver si il num ed il numer da las candidatas e dals candidats che Vus avais tschernì. Quai sto vegnir fatg a maun. Las candidatas ed ils candidats che Vus tschernis, ston figurar sin las glistas prestampadas.
Cumular: Vus pudais cumular er sin il cedel electoral vid. Il num ed il numer d'ina persuna na dastga dentant betg vegnir scrit si pli che duas giadas.

-> Mintga persuna menziunada survegn ina vusch da candidat (duas, sch'i vegn cumulà). Sche Vus inditgais il num u il numer d'ina glista, dumbran las lingias vidas sco vuschs per questa glista. Sche Vus na faschais betg quai, na quintan las lingias vidas per nagina glista (vuschs persas).

Attenziun: In num na dastga betg figurar pli che duas giadas sin in cedel electoral, ed il dumber total dals nums sin il cedel electoral na dastga betg esser pli grond ch'il dumber dals sezs ch'èn attribuids a Voss chantun.

Mettai il cedel electoral vid en l'urna

Controllai Vossa elecziun

Per che Vossas vuschs sajan valaivlas, stuais Vus observar las suandantas reglas:

Duvrai mo in unic cedel electoral uffizial.
Scrivai a maun ed en moda bain legibla.
Tscherni mo candidatas uffizialas e candidats uffizials, pia talas e tals che figureschan sin ils cedels electorals prestampads.
Scrivai adina cumplettamain ils nums, prenums e numers da las candidatas e dals candidats. Virgulettas e scursanidas sco «idem», «dito» u sumegliantas n'èn betg permessas.
Evitai commentaris, remartgas e dissegns sin il cedel electoral u sin la cuverta da votar.

Terminai Vossa elecziun

Observai las remartgas ed ils termins en Voss chantun ed en Vossa vischnanca. Mettai il cedel electoral en la cuverta da votar previsa u en il caum previs da la cuverta (chantun Soloturn) e suttascrivai l'attest da votar (excepziun: chantun Basilea-Citad).

Ulteriur proceder:

Vus pudais eleger per correspundenza. Duvrai la cuverta da resposta ch'è previsa per quest intent.
Mettai la cuverta da resposta en la chascha da brevs respectiva da Vossa vischnanca: per regla chattais Vus questa chascha da brevs tar l'administraziun communala. (Attenziun: en il chantun Vallais n'è quai betg pussaivel).
Il di da l'elecziun pudais Vus er metter persunalmain Vossa cuverta da votar en l'urna.

Tschertga

Uschia vegn elegì il Cussegl naziunal

Tscherni in cedel electoral

Controllai Vossa elecziun

Terminai Vossa elecziun